Die skande van Naboomspruit
Tydens verlede jaar se Ringsvergadering van die Ring van Waterberg, is
dr. Hennie Botes (Naboomspruit) tot voorsitter verkies en ds. Chris
Liebenberg (Nylstroom) as skriba. Omdat daar geen ander predikante in
die ring is nie, kon sekundi lede nie verkies word nie.
Sondag daag die “ringskommissie” ongenooid by die gemeentevergadering
van Naboom op, nadat die gemeenteskriba, oudl Nicus Prinsloo, die vorige
middag bekend gemaak het dat die ringskriba laat weet het dat hulle die
gemeentevergadering die volgende dag gaan kom bywoon.
Die afvaardiging word gelei deur ds. Marius Bacon, nuwe predikant van
Warmbad, wat maar drie maande in die ring is. (Ds. Bacon het aan die
voorpunt gestaan van die a la carte-nagmaal en ander goggas tydens die
laaste predikantevergadering.) Hy word vergesel van die ringskriba, ds.
Liebenberg, en die drie ouderlingslede van die ringskommissie, oudle.
Piet Pretorius (Rust der Winter), Andries de Beer (Warmbad) en Fanie van
Zyl (Waterberg/Nylstroom).
Dit blyk toe dat daar ‘n afsonderlike vergadering gehou is waar al die
lede van die ringskommissie teenwoordig was, sonder die medewete of
teenwoordigheid van die wettig verkose voorsitter, dr. Botes. By dié
geleentheid is skynbaar besluit dat ds. Bacon gekoöpteer word as
sekunduslid vir die voorsitter, dr. Botes, en ook as voorsitter van die
afvaardiging sal optree tydens die (ongenooide) besoek aan Naboomspruit.
Volgens gemeentelede wat by die gemeentevergadering teenwoordig was,
het ds. Bacon glo op 'n aggressiewe wyse, wat die amp nie waardig is
nie, aangedring op 'n onbeperkte spreekbeurt. Die gevolg van sy optrede
was, volgens die waarnemers, was weersin en verdeelheid in die gemeente.
Uiteindelik het die oorgrote meerderheid van die ongeveer twee honderd
gemeentelede wat die vergadering bygewoon het, uit protes teen die
optrede van ds. Bacon, die vergadering verlaat en het net ‘n handjievol
gemeentelede saam met die “afvaardiging” van die
“ringskommissie”agtergebly.
Van dr. Botes word getuig dat hy deurgaans beleefd, waardig, kalm,
professioneel en tegemoetkomend opgetree het, en aan die afvaardiging by
herhaling gestel het dat hulle optrede onkerkordelik is.
DIE VRAE WAT ONWILLEKEURIG BY ‘N MENS OPKOM, is:
1. Wie het di Bacon en Liebenberg en die drie ringsouderlinge
geadviseer en gepor om hierdie onkerkordelike weg te volg rondom die
agteraf vergadering en die ontstigting van die gemeente-vergadering?
2. Nou dat hierdie onkerkordelike kerklike samespanning openbare kennis
is, is daar groot afwagting om te sien of die Kommissie van die AKV die
lede van die “afvaardiging” onder die opsig vir gesprek gaan oproep?
Hulle doen dit buitendien deesdae op blote gerugte. Indien hulle
verklaar dat hulle slegs kan optree indien daar ‘n formele klag teen die
broeders gelê word, of dat hulle kwansuis onder ‘n hofbevel sou staan
wat hulle verbied om teen enige predikant onder die opsig en tug op te
tree, sal dit duidelik wees dat hulle dié optrede goedkeur en selfs die
indruk van aandadigheid kan skep. Dan sal hulle leuse van “in die
voetspore van Jesus” ‘n klinkende metaal en luidende simbaal geword het.
Sê Jesus nie sélf: “Aan hulle vrugte sal hulle geken word” nie?